19/05/11

---- Մայիսի 14-ին ----
ԹԱՆԳԱՐԱՆԱՅԻՆ ԳԻՇԵՐ 2011

Այս տարի ‹‹Թանգարանների գիշեր›› միջազգային ակցիան կրում էր ‹‹Հիշողություն›› խորագիրը, սակայն հայ տպագրության 500-ամյա հոբելյանին ընդառաջ /2012թ./, հանրապետությունում այն կրեց ‹‹Գրավոր հիշողություններ›› անվանումը: Ինչպես ամեն տարի, այս անգամ ևս Ավ. Իսահակյանի տուն-թանգարանը սիրով միացավ այդ ակցիային:

Թանգարանի մուտքի մոտ այցելուների ուշադրությունն էր գրավում իսահակյանական խոսքերով ձևավորված վահանակը, որի վրա էլ նրանք, օրվա խորհրդով ոգևորված, թողնում էին իրենց տպավորությունները, մաղթանքները և ջերմ խոսքերը:
Մայիսի 14-ին թանգարանն ունեցել է շուրջ 2170 այցելու:
Այցելուների 65% 12-25 տարեկան, իսկ մնացածը` միջին և բարձր տարիքի: Ունեցել ենք նաև այցելուներ արտասահմանից` Էկվադոր, Բելգիա, Կանադա և Ռուսաստան, Թեհրան:


‹‹Թանգարանների գիշեր 2011››-ի շրջանակում տեղի ունեցան հետևյալ միջոցառումները.

18.00 – 18.40` ‹‹Եվ այր մի Մաշտոց անուն››` գրական – երաժշտական կոմպոզիցիա:

Միջոցառումը բացեցին ‹‹Մեսրոպ Մաշտոց›› խոսքի մշակույթի կենտրոնի սաները` ղեկավար Ն. Անտոնյան: Հայ անվանի գրող Պարույր Սևակի ստեղծագործությունների հիման վրա` ‹‹Եվ այր մի Մաշտոց անուն›› խորագրով, նրանք ներկայացրեցին գեղեցիկ գրական-երաժշտական կոմպոզիցիա:

---

19.00 – 20.00` ‹‹Նարեկացի››` արվեստի կենտրոնի ժողգործիքների համույթի ելույթը:

Միջոցառման հաջորդ հյուրն էր ‹‹Նարեկացի›› արվեստի միության ‹‹Նարեկացի›› ժողովրդական նվագարանների համույթը` գեղ. ղեկավար Հովիկ Սահակյան: Հնչեցին ժողովրդական, գուսանական երգեր և նվագներ` քանի որ մեր ազգի պատմությունը, հոգևոր հարստությունները հիշողություններ են դարձել ոչ միայն գիր ու գրականության, այլև երաժշտության միջոցով:

---

20.30 – 21.30` ‹‹Սիրտս խաղաղվեր, հանգչեի հավերժ Անիի անմահ պարիսպների տակ … ››` գրական – երաժշտական կոմպոզիցիա:

‹‹Սիրտս խաղաղվեր, հանգչեի հավերժ Անիի անմահ պարիսպների տակ … ››: Այս խորագրով միջոցառումը նվիրված էր պանծալի Անիի հիմնադրման 1050-ամյակին: Իսահակյանի հուշերի հիման վրա ստեղծված գրական-երաժշտական կոմպոզիցիայի ընթացքում /ռեժիսոր Դավիթ Հակոբյան/ ներկայացվեցին Իսահակյանի հուշերը` այցելությունները Անի, ասույթները և Անիին նվիրված ստեղծագործությունները:
Այցելուները մեծ հետաքրքրությամբ դիտեցին հատկապես Անիի մասին պատմող լուանկար-բացիկների ցուցահանդեսը: Իսահակյանի անձնական հավաքածուից ցուցադրվում էին 19-րդ դարի վերջի և 20-րդ դարասկզբի բացիկներ, որոց վրա հայերեն և ֆրանսերեն գրված էր. ‹‹Վերք Հայաստանի: Անի. մայրաքաղաք Բագրատունեաց››:

---

22.00 – 23.00` ‹‹Ավետիք›` ֆիլմի դիտում:
Հանդիպում ֆիլմի ռեժիսոր Ռուբեն Քոչարի հետ թեյի սեղանի շուրջը:

ՙ‹‹Թանգարանային գիշեր›› միջոցառումների շարքը եզրափակվեց ‹‹Ավետիք›› ֆիլմի դիտումով` քանզի հուշերի և հիշողությունների վերարտադրման ամենամեծ միջոցը կինոն է և Իսահակյանի մտքերն ու խոհերն էլ իրենց գեղարվեստական արտացոլումն են գտել Ռուբեն Քոչարի ‹‹Ավետիք›› ֆիլմում:
Ֆիլմի դիտումից հետո, Վարպետի հարկի տակ` թեյի սեղանի շուրջ, կայացավ հանդիպում հեղինակի` ռեժիսոր Ռուբեն Քոչարի հետ: Միջոցառմանը ներկա էին գրականության և արվեստի ժող. համալսարանի ունկնդիրները` Յուրի Հովհաննիսյանի ղեկավարությամբ, Կինոյի և թատրոնի պետական ինստիտուտի ուսանողները, գրականության, արվեստի և երաժշտության բնագավառի մարդիկ, ինչպես նաև բազմաթիվ այլ այցելուներ:
Ներկաները հաճույքով և հետաքրքրությամբ դիտեցին ֆիլմը, լսեցին հեղինակին: Հարց ու պատասխանի միջոցով ծավալվեց աշխույժ և բովանդակալից զրույց: Մթնոլորտն այնքան ջերմ էր ու մտերմիկ, որ ներկաները` չնայած կեսգիշեր էր, չէին շտապում հեռանալ:

 

01/05/11

Ապրիլի 28-ին ‹‹Ավետիք Իսահակյան›› խաղ-վիկտորինայի այս փուլի մասնակիցներն էին Մայակովսկու անվ. թիվ 7 դպրոցի ‹‹Վիկտորիա››, Խրիմյան Հայրիկի անվ. թիվ 10 դպրոցի ‹‹Խրիմյանցիներ›› և Տիմոշենկոյի անվ. թիվ 39 դպրոցի ‹‹Մետաքս›› թիմերը:
Ժյուրիի կազմում էին մեծանուն բանաստեղծի թոռը` Մանուկ Աբեղյանի անվան գրականության ինստիտուտի տնօրեն Ավիկ Իսահակյանը, Կենտրոն վարչական շրջանի կրթության և մշակույթի աշխատակից Արփինե Մուրադյանը, թանգարանի տնօրեն Հ. Մելքոնյանը, գլխ. ֆոնդապահ Ա. Խորենյանը, հանրահռչակման և ցուցադրությունների կազմակերպման բաժնի վարիչ Ռ. Մեսրոպյանը:
Խաղը վարում էր ավագ գիտաշխատող Ց. Նազարյանը: Խաղն ընթացավ հետաքրքիր և համառ պայքարում: Երեք թիմերն էլ շատ լավ էին պատրաստվել: Նրանք ցուցաբերեցին գիտելիքների խորը իմացություն և ակտիվություն: Ուրախալին այն էր, որ մասնակիցներն ոչ միայն ճիշտ էին պատասխանում վիկտորինայի հարցերին, այլև մեծ ոգևորությամբ արտասանում էին հատվածներ Իսահակյանի ստեղծագործություններից, նամակներից և հուշերից:
Թե՛ ‹‹Վիկտորիա›› և թե՛ ‹‹Մետաքս›› թիմերը շատ լավ տպավորություն թողեցին, սակայն իրենց գեղեցիկ և հետաքրքիր խաղով, բովանդակալից խոսքով հատկապես աչքի ընկան Խրիմյան Հայրիկի անվան դպրոցի սաները, որոնք էլ խաղի հաղթողները դարձան: Ներկաները մեծ գոհունակություն հայտնեցին կազմակերպված միջոցառման ուսուցողական և ճանաչողական բովանդակության համար: Ուսուցիչները նշեցին, որ լավ պատրաստվելուն հատկապես շատ էր օգնել այցելությունը թանգարան և այստեղ լսած էքսկուրսիան: Մասնակից թիմերը պարգևատրվեցին թանգարանի կողմից սահմանված պատվոգրերով և փոքրիկ հուշանվերներով:

20/04/11

Ապրիլի 9-ին թանգարանում տեղի ունեցավ անվանի բանաստեղծ Օսիպ Մանդելշտամին նվիրված գրական-երաժշտական ցերեկույթ` ՌԴ ‹‹Ռոսսոտրուդնիչեստվո›› գործակալության ռուսական գիտության և արվեստի կենտրոնի հետ համատեղ: Զեկուցումով հանդես եկան ‹‹Ռոսսոտրուդնիչեստվո›› գործակալության մշակութային կապերի համակարգող Էմմա Բուդաղյանը և բանասիրական գիտությունների դոկտոր Ավիկ Իսահակյանը: Բանախոսները հանգամանորեն խոսեցին Մանդելշտամ-Հայաստան առնչությունների մասին, որը անշուշտ շատ էր հետաքրքրում լսարանին: Հնչեցին պատառիկներ բանաստեղծի Հայաստանին նվիրված շարքից:
Վերջում, Մարինա Վարդանյան և Հայարփի Գրիգորյան դաշնամուրային դուետի կատարմամբ, հնչեցին հատվածներ ռուս դասական երաժշտությունից:

10/04/11

Ապրիլի 6-ին թանգարանում կայացավ ‹‹Ավետիք Իսահակյան›› խաղ-վիկտորինա կրթական ծրագրի հերթական փուլը: Մասնակցում էին Վ. Տերյանի անվ. թիվ 60 դպրոցի ‹‹Արևամանուկներ››, Կ. Զարյանի անվ. թիվ 117 դպրոցի ‹‹Արագած›› և Մակսեդան օտար լեզուների խորոցված ուսուցման դպրոցի ‹‹Մակսեդան›› թիմերը:
Ժյուրիի կազմում էին թանգարանի տնօրեն Հ. Մելքոնյանը, Վահան Թոթովենցի անվան դպրոցի հայոց լեզվի և գրականության ուսուցչուհի Հերմինե Դավթյանը, թանգարանի գլխ. ֆոնդապահ Ա. Խորենյանը, հանրահռչակման և ցուցադրությունների կազմակերպման բաժնի վարիչ Ռ. Մեսրոպյանը: Խաղը վարում էին թանգարանի ավագ գիտաշխատողներ Ց. Նազարյանը և Մ. Սոխակյանը:
Խաղն ընթացավ թեժ և լարված պայքարում: Երեխաներն աչքի ընկան մեծանուն գրողի` Ավ. Իսահակյանի կյանքի ու գրական գործունեության բավականին խորը և հիմնավոր իմացությամբ, ցուցաբերեցին մեծ ակտիվություն և ոգևորվածություն: Խաղի ընթացքում բոլոր թիմերն էլ հիմնական պատասխանից բացի տալիս էին արժեքավոր և կարևոր լրացումներ: Համառ և հետաքրքիր պայքարում բոլոր 3 թիմերն էլ հավաքեցին հավասարաչափ միավորներ և ինչպես ասում են` հաղթեց Իսահակյանը, քանի որ մեր նպատակն էլ հենց այն էր, որ աշակերտները կարդան և ուսումնասիրեն մեծ գրողի կյանքն ու գրական գործունեությունը:
Ներկաները մեծ գոհունակություն հայտնեցին կազմակերպված միջոցառման ուսուցողական և ճանաչողական բովանդակության համար: Ուսուցիչները նշեցին, որ լավ պատրաստվելուն հատկապես շատ էր օգնել այցելությունը թանգարան և այստեղ լսած էքսկուրսիան: Մասնակից թիմերը պարգևատրվեցին թանգարանի կողմից սահմանված պատվոգրերով և փոքրիկ հուշանվերներով:

02/04/11

Մարտի 25 Աշխատանքային այցով թանգարանում էին գտնվում Գաֆէսճեան արվեստի կենտրոնի ադմինիստրացիոն կազմը` կենտրոնի տնօրենի ժ/պ Վահագն Մարաբյանի գլխավորությամբ: Նրանք նպատակ ունեին ծանոթանալու ինչպես թանգարանի կառուցվածքին ու գործունեությանը, այնպես էլ աշխատակիցների հետ:
Վարպետի թանգարանի տնօրեն Հասմիկ Մելքոնյանը սիրով ընդունեց և ողջունեց հյուրերին, այնուհետև ավագ գիտաշխատողներ Ց. Նազարյանի և Մ. Սոխակյանի օգնությամբ նրանք ծանոթացան թանգարանի նոր ցուցադրությանը: Գլխավոր ֆոնդապահ Անժելա Խորենյանը կոլեգաներին ծանոթացրեց թանգարանի ֆոնդերի և դրանց հետ կապված աշխատանքներին, իսկ ցուցադրությունների կազմակերպման և հանրահռչակման բաժնի վարիչ Ռուզաննա Մեսրոպյանը` հասարակության հետ տարվող աշխատանքներին (այցելուների սպասարկում, միջոցառումների և կրթական ծրագրերի կազմակերպում): Այնուհետև ավագ գիտաշխատող Լուսինե Մարյանյանի օգնությամբ հյուրերին ներկայացվեց թանգարանի 2010թ. միջոցառումերի մասին պատմող տեսանյութեր:
Գաֆէսճեան արվեստի կենտրոնի ժամանակավոր պաշտոնակատար Վահագն Մարաբյանն էլ հանգամանորեն խոսեց իրենց բազմաբովանդակ աշխատանքային գործունեության մասին` թանգարանին նվիրելով կատարած և առաջիկա աշխատանքների մասին պատմող նյութերի փաթեթ: Կարևորելով փորձի փոխանակումն իբրև աշխատանքի արդյունավետ միջոց` երկու թանգարանների աշխատակիցները կլոր սեղանի շուրջ քննարկեցին աշխատանքի կազմակերպման և գործունեության կարևոր հարցեր, անդրադարձան իրենց հուզող հարցերին և դրանց լուծման եղանակներին:
Հանդիպումը շատ ջերմ էր և արդյունավետ: Բնականաբար, յուրաքանչյուր թանգարան ունի իր առանձնահատկություններն ու յուրահատկությունները, իսկ քննարկումն օգնեց միմյանց` ծանոթանալու և ընկալելու նոր ու հետաքրքիր աշխատանքային մանրամասներ, որոնք երկուստեք օգտակար են և ընդունելի: Վստահ ենք, որ նման հանդիպումները կնպաստեն և կխթանեն էլ ավելի արդյունավետ գործունեության և համագործակցության:

09/03/11

Տաթև դպրոցի սաները փետրվարի 23-ին Վարպետի հարկի տակ անցկացրեցին բանաստեղծին նվիրված շատ գեղեցիկ միջոցառում: Երեխաները ներկայացրեցին Իսահակյանի կյանքն ու գրական գործունեությունը ընդգրկող հարուստ և բովանդակալից գրական-երաժշտական կոմպոզիցիա: Բանաստեղծի տուն-թանգարանում անցկացրած էքսկուրսիան այնքան էր ոգևորել երեխաներին, որ նրանք ցանկություն էին հայտնել կազմակերպել Իսահակյանին նվիրված միջոցառում:

24/02/11

Փետրվարի 20-ին թանգարանում կազմակերպվեց համերգ Երևանի պետական կոնսերվատորիայի վոկալ բաժնի շնորհալի ուսանողների մասնակցությամբ, Ղեկավար` Ռաֆայել Հակոբյանց: Ելույթ ունեցան Հովսեփ Նշանյանը, Կարո Խաչատրյանն ու Եպրաքսյա Պողոսյանը: Նրանք կատարեցին Վերդիի, Դոնիցետտիի, Տիգրանյանի և Ռախմանինովի ստեղծագործություններից: Երիտասարդ կատարողները մեծ վարպետությամբ կատարեցին համաշխարհային երաժշտական գանձարանի այդ անվանի գոհարները` ներկաներին պատճատելով հիացմունք և զարմանք:

20/02/11

Փետրվարի 5-ին թանգարանում տեղի ունեցավ հանդիպում արձակագիր, հրապարակախոս Մարգո Ղուկասյանի հետ: Հետաքրքիր էր լսել մեր անվանի գրողին ու հրապարակախոսին, որի հոդվածներն ու լրագրողական վերլուծությունները ժամանակին մեծ արձագանք են գտել ընթերցողների շրջանում:
Դրանք միշտ էլ աչքի են ընկել սուր և հրատապ հարցադրումներով, իսկ հեղինակը հետևողական է եղել դրանց հետագա ընթացքին: Մարգո Ղուկասյանը 12 գրքի և բազմաթիվ հոդվածների հեղինակ է:
Ներկաները մեծ հետաքրքրությամբ և խորին ակնածանքով լսեցին Մարգո Ղուկասյանին: