Հոկտեմբերի 30-ին Ավ․Իսահակյանի տուն-թանգարանը, ԵՊՀ հայ բանասիրության ֆակուլտետի և Երևանի Ավ. Իսահակյանի անվան N16 ավագ դպրոցի հետ համագործակցությամբ, հանդես եկավ միջոցառումների հատուկ ծրագրով՝ նվիրված մեծ գրողի 150-ամյակին։ Օրը սկսվեց հոբելյանական քայլերթով, որից հետո երթի 150 մասնակիցները ծաղիկներ խոնարհեցին Վարպետի շիրիմին: Հարգանքի տուրքին ներկա էին Կրթության, գիտության, մշակույթի և սպորտի նախարարի տեղակալ Ալֆրեդ Քոչարյանը, Վարպետի թոռ Ավիկ Իսահակյանը, Գրողների միության նախագահ Էդուարդ Միլիտոնյանը, Ավ. Իսահակյանի անվան գրադարանի տնօրեն Ռուզաննա Բարսեղյանը, ԵՊՀ հայ բանասիրության ֆակուլտետի դեկան Արշալույս Գալստյանը, Ավ.Իսահակյանի անվան թիվ 16 ավագ դպրոցի տնօրեն Անահիտ Կիրակոսյանը և իսահակյանասեր հանրությունը:
Միջոցառումները շարունակվեցին տուն-թանգարանում. տեղի ունեցավ «Մի մկան պատմություն» պատկերազարդ խաղ-գրքերի շնորհանդեսը, շրջայցը թանգարանի գրական հատվածի նոր ցուցադրությունում և Արա Հովսեփյանի հեղինակած Իսահակյանի դիմանկարի նվիրատվության արարողությունը, իսկ տոնական օրվա բարձր տրամադրությունը ապահովեցին Հանրային ռադիոյի «Արևիկ» մանկապատանեկան անսամբլի, «Հայ մյուզիք բենդ»-ի և «Արև մոդելս» ՀԿ-ի սաները։
Շնորհակալություն ենք հայտնում բոլոր մասնակիցներին՝ մեծ գրողի հիշատակը վերստին հարգելու և արժևորելու համար։ :

Գլխավոր էջ | Էջի սկիզբ